سياسة الخصوصية

1. شكون احنا

وائل أكاديمي أكاديمية تعليميّة في تونس، تقدّم دروس وحصص مباشرة وتسجيلات للتلامذة من التاسعة حتّى للباكالوريا. المنصّة تتكوّن من موقع waelacademy.com، فضاء التلميذ، فضاء الوليّ، فضاء الأستاذ، وتطبيق الهاتف. هذه السياسة تنطبق على الجميع.

2. شنوّة المعطيات اللي نجمعوها

معطيات الحساب. الاسم واللقب، رقم الهاتف، البريد الإلكتروني (اختياري)، وكلمة السر — كلمة السر تتخزّن مشفّرة ولا حتّى احنا نجّمو نقراوها.

معطيات الدراسة. المستوى، المادة الاختيارية، المجموعات، الحصص المبرمجة، الحضور فيها، التقدّم في الدروس والتمارين، والتسجيلات اللي شفتها.

معطيات إداريّة. الاشتراك، المبالغ المسجّلة والخلاصات اللي تعمل في الأكاديمية، وكودات الإحالة. التطبيق ما ياخذش خلاص وما فيه حتّى عمليّة شراء. الخلاص يتسجّل من عند إدارة الأكاديمية، والتطبيق يوريلك الحساب برك.

المراسلات. الرسائل اللي تبعثها لأستاذك أو للإدارة، مشاركاتك في المنتدى وتعليقاتك على الفيديوهات، والملفّات ولا الصور اللي تحمّلها في المحادثة.

معطيات تقنيّة. معرّف الجهاز — وهو رقم عشوائي يتولّد في تليفونك ذاته وما فيه حتّى حاجة من الجهاز — ورمز الإشعارات، والجلسات النشيطة (اسم الجهاز وتاريخ آخر دخول) باش تنجّم تشوف وين حسابك محلول وتسكّرو.

التطبيق ما يطلبش الموقع الجغرافي، ولا الكاميرا، ولا الميكرو، ولا جهات الاتصال، ولا الصور اللي في تليفونك.

3. علاش نستعملوهم

• باش تدخل لحسابك ويتعرّض عليك برنامجك، حصصك وتسجيلاتك.
• باش الأكاديمية تسيّر التسجيل، المجموعات، الحضور والاشتراكات.
• باش نبعثولك إشعارات على حصّة قرّبت ولا تسجيل جديد — تنجّم توقّفهم من تليفونك.
• باش نبعثولك رمز تأكيد عبر SMS كي تسجّل ولا كي تنسى كلمة السر.
• باش نحافظو على أمان الحساب (قاعدة الجهازين، الجلسات النشيطة).

ما نبيعوش المعطيات لحتّى واحد. ما فمّاش إشهار في المنصّة، وما نتبعوش المستعملين في تطبيقات ولا مواقع أخرى.

4. مع من نتقاسموهم

نتقاسمو أقلّ ما يمكن، وكان مع مزوّدين ضروريين باش الخدمة تخدم:

• Bunny Stream — استضافة وتوزيع الفيديو. تشوف الفيديو اللي تحلّه وعنوان IP متاعك، ما تشوفش اسمك.
• Zoom — الحصص المباشرة. اسمك يظهر للأستاذ ولزملائك في الحصّة.
• Google (Firebase Cloud Messaging) — إرسال الإشعارات لتليفونك. ياخذ رمز الإشعارات ومحتوى الإشعار.
• WinSMS — إرسال رموز التأكيد. ياخذ رقم هاتفك ونصّ الرسالة.

الفيديوهات، الملفّات وقاعدة المعطيات مستضافة على خوادم الأكاديمية ومزوّديها. ننجّمو نكشفو معطيات إذا فرضها علينا القانون التونسي ولا طلبتها سلطة قضائيّة.

5. التلامذة القاصرين

أغلب تلامذتنا قاصرين. التسجيل يتمّ عن طريق الأكاديمية وبموافقة الوليّ، والوليّ عندو فضاء خاصّ بيه يتابع منّو ابنو. إذا كنت وليّ وتحبّ تطّلع على معطيات ابنك ولا تصلّحها ولا تحذفها، اتصل بينا وننجّمو نعاونوك.

ما نجمعوش معطيات من التلامذة أكثر ممّا يلزم للدراسة، وما نستعملوش معطياتهم في الإشهار.

6. حذف الحساب

تنجّم تحذف حسابك بروحك، من التطبيق ولّا من فضاء التلميذ: البروفيل ← حذف الحساب. يطلب منّك كلمة السر باش يتأكّد بلّي إنت، وبعدها الحذف فوري. الخطوات بالتفصيل، وكيفاش تطلب الحذف إذا ما عادش تنجّم تدخل لحسابك، في صفحة حذف الحساب.

كي تحذف حسابك: اسمك، رقم هاتفك وبريدك الإلكتروني يتمحاو، كلمة السر تتلغى، وكلّ الجلسات ورموز الإشعارات يتحيّدو. ما تنجّمش تعاود تدخل بنفس الحساب، ورقم هاتفك يولّي حرّ لتسجيل جديد.

شنوّة اللي يبقى ولاش. الأكاديمية تحافظ على وثائق التسجيل والخلاص والحضور، خاطر هي دفاترها ولازمها قانونيًّا ومحاسبيًّا — أمّا هذي الوثائق ما تبقاش مربوطة باسمك. الرسائل والمشاركات اللي كتبتها في المنتدى تبقى في بلاصتها بلا اسم، باش ما تتقطّعش نقاشات تخصّ ناس أخرى.

7. مدّة الاحتفاظ

نحافظو على معطيات حسابك ما دام الحساب موجود. بعد الحذف، ما يبقى كان اللي ذكرناه فوق بلا اسم. سجلّات الدخول التقنيّة تتمحا في أجل قصير.

8. أمان المعطيات

كلّ الاتصالات بين التطبيق والخوادم مشفّرة (HTTPS). كلمات السرّ متخزّنة بتشفير أحادي الاتجاه. في التليفون، رموز الدخول متخزّنة في الخزنة الآمنة للنظام (Keychain في iOS و Keystore في أندرويد) موش في ملفّ عادي. الدخول للمعطيات في الإدارة محدود حسب الدور.

9. حقوقك

• تطّلع على المعطيات اللي عندنا عليك.
• تصلّح اللي فيه غلط — من « بروفايلي » ولا عن طريق الإدارة.
• تحذف حسابك، كيما هو مشروح في الفقرة 6.
• توقّف الإشعارات من إعدادات تليفونك.

10. تغييرات على هذه السياسة

كي نبدّلو حاجة مهمّة، نحدّثو التاريخ اللي فوق ونعلمو المستعملين في المنصّة.

11. الاتصال بينا

على أيّ سؤال يخصّ خصوصيّتك ولا المعطيات متاعك: contact@waelacademy.com